Radarin aftur til viðgerðar í dag

Uttanlandsnevndin í løgtinginum kemur saman í dag klokkan 15.

Nevndin skal millum annað viðgera ætlaða radaran á Sornfelli.

Onki er avgjørt, nær nevndin skal geva Jenisi av Rana, landstýrismanni í uttanríkismálum, svar um radaran, men greitt er, at tað neyvan verður eitt eintýtt svar.

Skriva ikki tilmæli

Uttanlandsnevndin skrivar ikki tilmæli, men landstýrismaðurin ráðførir seg við nevndina. Hann skal tó ikki fylgja teimum ráðum, hann fær í nevndini.

Fundurin í Uttanlandsnevndini í dag verður tann fyrsti, síðani Elsebeth Mercedis Gunnleygsdóttir og Jacob Vestergaard fóru úr landstýrinum og aftur í tingið. 

Tey bæði tóku sessirnar í uttanlandsnevndini, sum Annika Olsen og Brandur Sandoy høvdu frammanundan.