Endurgjald fyri sorgarfarloyvi

Sólvit E. Nolsø, landsstýrismaður í almannamálum, hevur sent eitt lógaruppskot til ummælis, sum hevur til endamáls at veita foreldrum rætt til endurgjald fyri mista arbeiðsinntøku, um barn, yngri enn 18 ár doyr, ella um barnið er deyðføtt.

Løgtingið hevur fyrr heitt á landsstýrið um at bera so í bandi, at foreldur, sum koma í hesa ringast hugsandi støðuna, skulu fáa møguleikan at syrgja, uttan at skula hugsa um at verða sjúkrameldað, søkja um dagpening, ella at arbeiðsgevarin verður álagdur at rinda løn í langa tíð.

Sambært uppskotinum fara foreldrini at fáa rætt til endurgjald fyri mista arbeiðsinntøku upp til umleið 25.500 kr. um mánaðin, og endurgjaldið kann veitast í seks mánaðir í part.

Gongst sum ætlað, kemur broytingin í gildi 1. januar 2023.