Lógarheimild skal nú fáast fyri at sleppa eftir alilaksi í áum og vøtnum

Á summrið 2018 stóð nógvur laksur í Leynará, og hildið var, at hetta var alilaksur. 

Alifeløgini kannaðu sínar nótir, men funnu einki hol.

Fiskaaling gjørdi kanningar, sum vístu, at talan sannlíkt var um nýliga slopnan alilaks. 

Fiskurin var illa fyri, og fiskar doyðu í ánni. 

Kanningar staðfestu, at laksurin hevði hjarta-klovning.

Ótespilig sjón

Sjónin, sum møtti fólki, var ikki tespilig, tí nógvur laksur var deyður ella doyggjandi. 

Skjótt var eisini greitt, at tað er ógreitt, hvør hevur ábyrgdina av slopnum alifiski, sum er farin í áir, og hvør eigur at taka hann og gjalda fyri tað.

Ábyrgdin ásetast við lóg

Tað, sum hendi í Leynará summarið 2018, fekk Umhvørvis- og Vinnumálaráðið at gera eitt lógaruppskot.

Lógin, sum sigur, hvør skal taka alifisk, sum er sloppin í áir, er nú komin í løgtingið.

Uppskotið skal gera tað greitt, hvør hevur ábyrgdina av slopnum alifiski, sum er farin í áir, og hvør eigur at taka hann og gjalda fyri tað.

Tilbúgvingarætlan gerast

Sambært uppskotinum, so skal Landsdjóralæknin gera avtalu við Havbúnaðarfelagið um eina tilbúgvingarætlan um slopnan alilaks í áum. 

Endamálið við lógarbroytingini er stutt og greitt, at útvega greiða lógarheimild fyri, at í førum, tá alifiskur er sloppin og stendur í áum og vøtnum, og ikki kann staðfestast, hvaðan hann kemur, kann farast í áir og vøtn eftir honum.

Alivinnan skal bera kostnaðin.

Havbúnaðarfelagið valdi í 2018 at gjalda fyri at taka deyða ella doyggjandi alilaksin upp úr Leynará. 

Ivamál um talan er um lunnindi

Bóndafelagið sigur, at uppskotið ger seg inn á lunnindi hjá jarðareigarunum.

Tað eigur tí at vera ásett, at atgongd til vøtn og áir eigur at vera í samráði við jarðareigarar.

Umhvørvis- og Vinnumálaráðið heldur ikki, at sloppin alilaksur er lunnindi.