Fólkaskúlalógin skal eisini umfata KT-trygd

Fólkaskúlalógin skal broytast, so hon eisini umfatar KT-trygd.

Uppskotið um lógarbroytingina er til hoyringar í løtuni.

Mentamálaráðið sigur, at orsøkin til uppskotið er tann, at krøvini til KT-trygd og at verja persónsupplýsingar eru seinastu árini vorðin alsamt størri.

Tí skulu verandi reglur um rakstararútreiðslur hjá skúlunum gerast greiðari, so tað ikki verður ein tulkingarspurningur, um KT-skipanir, KT-útgerð, netsamband og dátutrygd eru partur av rakstrarútreiðlunum í fólkaskúlunum.

Eisini er endamálið at útvega lógarheimild fyri, at allar kommunur virka fyri, at fólkaskúlarnir verða partur av KT-heildarætlanini og kunnu fullnýta møguleikarnar bæði við atliti at Skúlaneti og lestrarfyriskipanini, sum koma fyri alt skúlaverkið.

Fyri allar kommunurnar undir einum verður mett, at eyka kostnaðurin til KT-økið verður hálvonnur millión, sigur Mentamálaráðið.