Leiðslan í SSL hevur verið ov lítið umhugsin

Málið er handfarið á sera óhepnan hátt, og vantandi umhugsni hjá leiðsluni merkir handfaringina.

Tað sigur Fíggjarnevndin hjá løgtinginum um bíleggingnarskipanina, sum Strandfaraskip landsins eru farin í holt við uttan útboð og uttan at gera skrivliga avtalu við valda veitaran.

Skipanin er ikki liðug, og tað er ógreitt, hvussu nógv, hon fer at kosta, sigur Fíggjarnevndin.

20211118_bileggingarskipan_farin_av_sporinum_0023.jpg

Fer at kosta átta mió. kr. 

Higartil hava Strandfaraskip landsins bókað 4,5 mió. kr., og óbókaðar rokningar eru 1,8  mió. kr., tí ósemja er við veitaran.

Strandfaraskip meta, at bíleggingarskipanin fer at kosta okkurt um átta mió. kr.

Eisini er ógreitt, nær, ella um, skipanin verður sett endaliga í verk, og um Strandfaraskip landsins verða noydd at fáa hjálp frá øðrum veitara til at gera skipanina lidna.

Nevndin mælir til, at landsstýrismaðurin neyvt fylgir málinum, so tað kann loysst skjótast tilber.

Málið um nýggju bíleggingarskipanina hevur fingið nógva umrøðu í Degi og viku.

Nógv viðurskifti fingin í rættlag

Fíggjarnevndin hevur skrivað álit um uppskotið til samtyktar um at góðkenna landsroknskapin fyri 2020.

Nevndin sigur, at nógv viðurskifti, sum løgtingsgrannskoðararnir vístu á, eru fingin í rættlag:

• Landsverk sigur, at stovnurin hevur tikið allar átalurnar til sín. 
• TAKS sigur, at umsitingin av Barsilsskipanini er fingin í rættlag.
• Eftirlitið við lønarhæddaravgjaldinum og tøkugjaldinum hjá alivinnuni verður nú framt regluliga.

Landsstýrismaðurin í heilsumálum hevur upplýst, at afturvendandi viðmerkingin frá Landsgrannskoðanini um kontuna fyri serviðgerð uttanlands hevur gjørt, at tey nú fáa rokningar frá sjúkrahúsum uttanlands fyri hvønn ársfjórðing. Fyrr var avroknað ákonto.

Og viðurskifti í sambandi við ferðaútreiðslur hjá Fólkaheilsuráðnum eru komin í rættlag.