Havbúnaðarfelagið: Vit skulu gevast at drepa springara

Springaradráp skal bannast í Føroyum.

Tað sigur Havbúnaðarfelagið í tíðindaskrivi í dag.

Havbúnaðarfelagið, sum umboðar alifyritøkurnar í Føroyum, sigur, at avleiðingarnar av springaradrápinum í september, tá umleið 1400 springarar løgdu beinini, hava verið ógvusligar og víðfevndar fyri alivinnuna, bæði tá tað kemur til umdømi og sølu, og ávirkanin av framhaldandi springaradrápum kann næstan ikki yvirmetast.

Størsta hóttan móti útflutninginum

Víðari stendur, at fleiri stórar handilsketur hava sagt, at tey meta framhaldandi dráp vera størstu hóttanina móti føroyskum útflutningi yvirhøvur, og tí er alivinnan sera stúrin um avleiðingarnar, um eitt springaradráp aftrat skuldi verið í Føroyum.

Havbúnaðarfelagið vísir eisini á, at útflutningurin er grundarlagið undir vælferðini í Føroyum, og at alivinnan stendur fyri einari helvt av samlaða vøruútflutninginunm. Politiska skipanin má fyrihalda seg til og taka tað í álvara, sum fólk, ið eta føroyskar fiskavørur, halda um tað, sum fyriferst í Føroyum, sigur felagið.

Í kjalarvørrinum av springaradrápinum í september, boðaði løgmaður frá, at springaradrápið skuldi eftirmetast.

Havbúnaðarfelagið sigur seg fegnast um hetta, og mælir løgmanni til at banna springaradrápi.

Hoyr ljóðbrot við Regini Jacobsen, stjóra í Bakkafrosti: