Ukraina: Russiskir hermenn taka seg aftur

Russiskir miðal skriva fyrrapartin, at russiska verjumálaráðið hevur givið hermonnum, sum hava verið við markið til Ukraina, boð um at venda aftur til herstøðir sínar.

Hermenninir hava gjørt sína skyldu, stendur í boðunum, skrivar NTB.

Russland hevur havt nógv herfólk við markið til Ukraina, og bæði USA og fleiri lond í vesturheiminum hava tulkað russisku framferðina sum eina ætlan at leypa á Ukraina.

Myndugleikarnir í Russlandi hava víst aftur, at ætlanin er at leypa á, men at talan er um hernaðarvenjing.

Eygleiðarar hava sagt, at russiska framferðin skal fáa vesturheimin at ansa eftir, og ikki ota seg eystureftir, fyri at fáa ræðið á londum, sum fyrr vóru saman við Sovjetsamveldinum.

Russland sigur einki um, hvussu nógv herfólk verða tikin aftur, men sagt verður, at útgerð verður sett í jarnbreytarvognar, og flutt aftur til herstøðirnar.

Gera ikki innrás

Russiski sendiharrin í ES, Vladimir Tsjizjov, sigur, at Russland fer ikki at gera innrás í Ukraina, um landið ikki verður noytt til tað.

- Skuldi tað hent, at Ukraina fer at gera seg inn á Russland, so fara vit at svara aftur, sigur russiski sendiharrin.

Og tað sama er galdandi, um ukrainar fara at gera seg inn á russiskar ríkisborgarar í Danbas-landspartinum í Eysturukraina, segði hann.

Har hava fólk, sum halda við Russlandi, havt valdið í nøkur ár.

Norðurlond eisini tilbúgvin

USA vil vera við, at Russland arbeiðir fyri at fáa Ukraina at leypa framav, so landið kann gera innrás, skrivar NTB.

Hóast Russland hevur boðað frá, at landið er farið at taka herfólk aftur, so heldur vesturheimurin ikki, at kreppan er av.

Norðurlond eru eisini tilbúgvin.

M.a. hevur Svøríki sent herfólk til Gotlands, Danmark hevur savnað 700-800 hermenn í Slagelse, og Noreg sendir nú í fyrstu atløgu 50-60 hermenn til Litava.