Uppskotið um barnaváttan komið í løgtingið

Uppskotið um barnaváttan kom í løgtingið í gjár.

Landsstovnar, kommunalir stovnar og privatir felagsskapir, bæði vinnufeløg og eitt nú ítróttarfeløg og samkomur, tað eru stutt sagt arbeiðsgevarar, skulu biðja um barnaváttan, áðrenn fólk kemur í beinleiðis og regluligt samband við børn undir 15 ár, sigur Uttanríkis- og Mentamálaráðið, har sum lógaruppskotið er gjørt.

Serlig revsiváttan

Ein barnaváttan er eitt serligt slag av revsiváttan, sum er avmarkað til upplýsingar um ávís lógarbrot.

Í einari barnaváttan eru ikki bara upplýsingar um dómar, men um allar avgerðir um kynslig brotsverk móti børnum, eisini  avgerðir um ákærufráfall.

Barnaváttanarlógin skal koma í gildi 1.apríl.

Grønland til dømis hevur eina lóg um barnaváttan, men í Føroyum eru eingi krøv um barnaváttan.