- Tíðindi, mentan og ítróttur
Eingin støða tikin til Hoydalar
Enn er ongin endalig støða tikin til, hvat skal gerast við gamla studentaskúlabygningin í Hoydølum.
Tað upplýsir Jenis av Rana, landstýrismaður í mentamálum, í svari til Hervør Pálsdóttir, tingkvinnu, í grein 52 spurningi.
Landið og Tórshavnar kommuna hava samráðst um eitt býti, har økið í Hoydølum við gráa skúlabygningin og parkeringsøkið verða seld kommunini, meðan landið keypir partin hjá Tórshavnar kommunu av ognunum á Frælsinum til eitt nýtt kampus.
Jenis av Rana sigur, at aðrar ætlanir verða eisini umhugsaðar, men tað er ov tíðliga at siga meira um hesar ætlanir.
Listalig miðstøð
Hervør Pálsdóttir spurdi eisini, um ætlanin er at gera gamla studentaskúlan í Hoydølum til listaliga miðstøð. Landstýrismaðurin svarar, at ongin nágreinilig ætlan fyriliggur at gera gamla studentaskúlan til listaliga miðstøð, tó at LISA í dag brúkar partar av gamla sanatoriinum til sítt virksemi.
Tað kann tó koma uppá tal at víðka samstarvið millum landið og LISA um brúk av bygningunum í Hoydølum, um eingin semja fæst millum kommununa og landið, sigur landstýrismaðurin í mentamálum.