Eykajáttan til hjálparpakkar og koronukanningar

Løgtingið fer í dag at viðgera uppskotið um eykajáttanarlóg, sum Uni Rasmussen, landsstýrismaður í fíggjarmálum, legði fram fyri einari viku síðani.

Uppskotið hevur 8,8 milliónir kr. í halli.

Sjey milliónir krónur skulu brúkast til at endurnýggja asfalt- og skervverkið hjá Landsverki. 

Upphæddin verður fíggjað við størri inntøkum frá virkseminum hjá Landsverki í ár, sigur Fíggjarmálaráðið.

Hjálparpakkar og koronukanningar

Skotið verður upp at játta 2,1 millión kr. til hjálparpakkar til vinnufyritøkur og 600.000 kr. til listafólk í sambandi við koronu. 

Kostnaðurin at umsita hjálparpakkarnar er 100.000 kr.

Játtanin til koronukanningar í ár er longu brúkt.

Biðið verður tí um seks milliónir kr. í eykajáttan, so vanliga virksemið á Landssjúkrahúsinum ikki verður rakt, tað sum er eftir av árinum, og til koronudeildina, so hon fær virkað fyrra hálvár.