Fólkaflokkurin fær nýggjan formann í dag

Floksstjórnin hevur fund í dag, og landsfundur verður í morgin

Jørgen Niclasen í Tinganesi, tá hann legði frá sær sum landsstýrismaður í fíggjarmálum, og Uni Rasmussen tók við. Í dag skal leiðslan í Fólkaflokkinum velja nýggjan formann fyri Jørgen Niclasen.

Mynd: Bjarni Árting Rubeksen

Krista Johnsdóttir Kreutzmann

18.03.2022 - 07:55

Fólkaflokkurin skal seinni í dag velja nýtt oddafólk, og skal í kvøld hava eitt ella tvey uppskot klár til floksstjórnina at taka støðu til.

Einki evstamark er fyri, nær floksstjórnin skal hava uppskotini í hendi, og valevnini kunnu sostatt bíða til sjálvan fundin at boða frá, at tey hava fingið neyðugu undirskriftirnar til at stilla upp.

Fyri at stilla upp krevst, at valevni hevur fýra undirskriftir frá ting- ella landsstýrisfólkunum hjá flokkinum.

Floksstjórnin hevur møguleika at vraka tað uppskotið og biðja um nýtt uppskot frá politisku umboðunum.

Í floksstjórnini eru tey átta tingfólkini, tey trý landsstýrisfólkini og tvey umboð fyri hvørt av teimum átta valfeløgunum. Tilsamans 27 fólk.

Fyrsti arbeiðsdagurin hjá nýggja formanninum verður í morgin, tá flokkurin hevur landsfund í Vestmanna. Fundurin byrjar klokkan eitt.