Vilja gera makaskifti um byggiloyvi til sambýli á Argjum

Sjálvt um sambýlið til fólk við menningartarni og fjølbreki í Reynstúni á Argjum er komið í løgtingið og viðgjørt har, hevur Tórshavnar kommuna ikki latið endaligt byggiloyvi enn.

Kommunan vil gera makaskifti við Almannamálaráðið. Tórshavnar býráð skal viðgera uppskotið í dag.

Avtala millum Tórshavnar kommunu og Almannamálaráðið um byggiøki er ávegis, men ikki endaliga avgreidd, stendur í skránni fyri býráðsfundin í dag.

Eigarafelagið "Havnardalur abc" mótmælir byggingini í Reynstúni.

Ikki áhugað fyri makaskifti

Tórshavnar kommuna hevur havt fund við Almannamálaráðið. Men ráðið var ikki serliga áhugað í at gera makaskifti, tí arbeiðið var boðið út.

Avtalað var at bíða, til tilboðini komu inn, fyri at vita, um tey eru innan fyri kostnaðarmetingina. 

Tilboðini eru nú komin, og tey eru undir kostnaðarmetingina, sum er 54 mió. kr.

Í sambýlinum, sum ætlanin er at byggja, vera 18 bústaðir, felagshøli og starvsfólkahøli.