Russiskt dagblað gevst við útgávuni fyribils

Novaya Gazete hevur fingið fleiri ávaringar frá myndugleikunum, sum hava sett miðlum forboð fyri at umrøða kríggið í Ukraina sum kríggj, í staðin fyri hernaðarligt átak

Russisku myndugleikarnir vilja ikki hava, at russisku miðlarnir umrøða kríggið í Ukraina sum kríggj, men sum eitt hernaðarligt átak.

Mynd: Ritzau Scanpix

Barbara Holm

28.03.2022 - 15:58

Óhefta russiska dagblaðið, Novaya Gazete, gevst at koma út, til "serliga hernaðarátakið" í Ukraina er liðugt.

Tað skrivar miðilin á heimasíðuni.

- Vit hava fingið enn eina ávaring frá myndugleikunum. Tí hava vit avgjørt at steðga útgávuni av blaðnum, til "serliga hernaðarátakið í Ukraina" er liðugt, skrivar miðilin.

Síðani kríggið í Ukraina byrjaði, hava russiskir myndugleikar sett miðlum í landinum forboð at umrøða kríggið sum eitt kríggj. Tað skal heldur eita eitt "serligt hernaðarátak".

Friðarheiðursløn á uppboðssølu

Í desember í fjør fekk dagblaðið, Novaya Gazete, og ábyrgdarblaðstjórin har, Dmitry Muratov, friðarheiðursløn Nobels.

Hann fekk friðarheiðurslønina saman við Mariu Ressa úr Filipsoyggjunum fyri sítt áhaldandi stríð at verja talu- og skrivifrælsi.

Fyri fáum døgum síðani setti russiski ábyrgdarblaðstjórin sína heiðursløn á uppboðssølu til frama fyri ukrainsk flóttafólk.

Dmitry Muratov

Blaðstjórin á Novaya Gazete, Dmitry Muratov, hevur sett friðarheiðurslønina, sum hann fekk, til sølu, og peningurin skal brúkast at hjálpa flóttafólki úr Ukraina. (Mynd: Ritzau Scanpix)