Vænta nakað av útróðri hesa vikuna

Trý stór ísfiskaskip og eitt minni eru úti. Skipini fáa mest av toski, hýsu og longu. Okkurt fer væntandi avstað í næstum. Sjey frystilínuskip eru við Ísland og eitt undir Føroyum.

Streymurin harðnar sum vikan gongur, men veðrið verður hampiligt. Fiskamarknaður Føroya roknar tí við nakað av útróðri hesa vikuna.

Annar djúpvatnstrolarin er á svartkalvaveiðu, hin liggur við bryggju

Seks pør til fiskiskap

Hjá partrolarunum eru seks pør til fiskiskap. Fiskiskapurin er misjavnur, tó er okkurt brúkiligt hál inn ímillum. 

Fimm trolbátar eru til fiskiskap. Teir fiska mest av toski, hýsu og so nakað av flatfiski.

Tvey garnaskip fiska svartkalva. Fiskiskapurin er brúkiligur. Tvey fiska havtasku, annað hevur brúkiligan fiskiskap, meðan hitt fer at draga fyrstu ferð í vikuni, skrivar Fiskamarknaðurin í meting fyri hesa vikuna.