Sálarfrøðilig hjálp partur av neyðtøkutilbúgvingini

Sálarfrøðilig hjálp partur av neyðtøkutilbúgvingini
Pengar eru settir av, og skipanin verður sett í gildi fyrsta dagin, sigur landsstýrismaðurin í heilsumálum
Nú er greitt, at sálarfrøðilig hjálp eisini verður partur av neyðtøkutilbúgvingini á Landssjúkrahúsinum.
 
30.03.2022 - 14:09

Sálarfrøðilig hjálp verður ein partur av neyðtøkutilbúgvingini frameftir.

Tað váttar Kaj Leo Holm Johannesen, landsstýrismaður í heilsumálum, fyri Kringvarpinum í dag.

Tað hevur alla tíðina verið ætlanin, at kvinnur, sum koma á neyðtøkutilbúgvingina á Landssjúkrahúsinum í sambandi við neyðtøku ella neyðtøkuroynd, skulu fáa í boðið at tosa við ein sálarfrøðing.

Pengar eru settir av til hetta, og tað er bert ein spurningur um dagar, til hetta tilboðið kemur í gildi, sigur landsstýrismaðurin, sum tó ikki vil gera samrøðu við Kringvarpið um málið.

 

Mannagongdir ikki lidnar

Tað var í síðstu viku, at tað kom fram, at neyðtøkutilbúgvingin ikki var klár, og at mannagongdirnar ikki vóru lidnar, tá ein kvinna í 30-unum bað um hjálp á Landssjúkrahúsinum í sambandi við eina neyðtøkuroynd fyri 10 døgum síðani.

Margit Stórá, varastjóri á Landssjúkrahúsinum, var í Degi og Viku fríggjadagin og bað um umbering fyri viðferðina, ið kvinnan fekk í sambandi við neyðtøkutilbúgvingina. 

Diana Reynstind, serlækni í kvinnusjúkum, sum hevur verið við í øllum arbeiðinum at fyrireika og seta á stovn neyðtøkutilbúgvingina á Landssjúkrahúsinum, segði við útvarpið leygardagin, at neyðtøkutilbúgvingin var sett í verk, áðrenn hon var klár. Eitt, sum manglaði, var eitt tilboð um sálarfrøðiliga hjálp til kvinnurnar.

Men landsstýrismaðurin í heilsumalum váttar í dag, at taðverður ein partur av tilbúgvingini í framtíðini.

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585