Støre tosað við Putin um kríggið í Ukraina

Norski forsætisráðharrin, Jonas Gahr Støre, tosaði í gjár í telefon við russiska forsetan, Vladimir Putin. 

Tað skrivar norska forsætismálaráðið. Støre tók stig til samrøðuna, skrivar forsætisráðið.

- Vit stúra fyri líðingunum, sum russiska innrásin hevur elvt til. Vit mugu gera okkara ítarsta fyri at fáa eina loysn, so partarnir gjøgnum samráðingar kunnu steðga krígnum, sigur Støre.

Einki skal vera óroynt

- Russland er grannaland hjá okkum, og tí hevur tað týdning, at vit kunna russiska forsetan um okkara støðu. Vit hava ikki stórar vónir um, at vit fáa nakað burturúr, men einki skal vera óroynt í støðuni, sum vit eru í nú. Líðingarnar mugu enda. Týdningarmiklasti boðskapurin var, at Russland skal steðga krígnum alt fyri eitt, sigur Jonas Gahr Støre.

Støre tosaði við sameind í Norðurlondum, Evropa og USA undan samrøðuni við Putin, skrivar norska forsætisráðið.

Seinnapartin í gjár tosaði Støre eisini við ukrainska forsætisráðharran, Denys Sjmyhal.