- Tíðindi, mentan og ítróttur
Fýra skip mugu gera ábøtur fyri at larma minni
Síðani 1. januar, tá ið felagskommunala reglugerðin um óljóð frá skipum kom, eru tilsamans fimm mátingar gjørdar.
Tað skrivar Kommunufelagið.
Felagið skrivar, at hóast fimm mátingar ikki ljóða av nógvum, so var í flestu førum góð grund at koma á staðið at gera mátingar.
Tvey skip vóru oman fyri núverandi markvirðið, meðan tvey onnur hava fingið upplýst, at tey ikki lúka stigvíst lækkandi markvirðini hetta fram til 1. januar 2025. Øll hesi skip mugu tí gera ábøtur ella broytingar, um tey vilja hava varandi virksemi við føroyska havn.
Hava møguleika at gera mátingar
Havnirnar hava eftir reglugerðini møguleika at gera mátingar, tá ið tær meta tað hóskandi. Men skal reglugerðin virka eftir ætlan, er eisini neyðugt at fólk gera vart við seg, um skip koma til bryggju og halda nógvan gang.
Havnarmeistarar kring landið boða frá, at teir hava varhugan av, at fleiri skip longu hava gjørt umvælingar, sum hava minkað um óljóðið. Tað er greitt, at fleiri skip, sum áður hava verið til ampa, larma minni enn í royndartíðini, skrivar Kommunufelagið.
Síðsta heyst vóru 273 royndarmátingar gjørdar.