Hevur ikki slept málinum um gongd í haga

Landsstýrismaðurin í umhvørvis- og vinnumálum, Magnus Rasmussen, hevur kunnað landsstýrið og samgonguna um, at tann semjan, sum samgonguskjalið leggur upp til um gongd í haga, er ikki í eygsjón. 

Tað sigur hann í svari til grein 52-fyrispurning hjá Eyðdis Hartmann Niclasen í Sambandsflokkinum í dag.

Hóast landsstýrismaðurin ásannar, at tað torført at finna eina loysn, so hevur hann ikki slept málinum.

Málið er framvegis í viðgerð, og tí vil landsstýrismaðurin ikki svara, hvørjar ítøkiligu avbjóðingarnar eru ímillum partarnar. 

Eyðdis Hartmann Niclasen

Eyðdis Hartmann Niclasen hevur fingið svar frá Magnusi Rasmussen, landsstýrismanni, um gongd í haga.

Ósemja um rættarstøðu

Tó vísir hann á, at talan er um fleiri ítøkiligar avbjóðingar, av ideologiskum og praktiskum slag.

Avbjóðingarnar eru eisini merktar av, at partarnir tykjast ikki hava felags fatan av galdandi rættarstøðu. 

Saman við umboðum fyri hinar samgonguflokkarnar arbeiðir landsstýrismaðurin í løtuni við at finna eina politiska loysn, sum kann flyta málið fram á leið, sigur Magnus Rasmussen.