Mette Frederiksen er á vitjan í Kyiv

Í dag fer danski forsætisráðharrin, Mette Frederiksen, at vitja Volodymyr Zelenskyj í ukrainska høvuðsstaðnum Kyiv. 

Mette Frederiksen er longu í Kyiv saman við spanska forsætisráðharranum Pedro Sanchez. 

Vitjanin er ein av fleiri meinlíkum vitjanum í ukrainska høvuðsstaðnum seinastu vikurnar, og tað letur til, at hetta er nakað, ið hevur stóran týdning fyri forsetan í Ukraina, sigur Rasmus Tantholdt, sum er útsent tíðindafólk fyri TV2, og í løtuni er í Kyiv. 

"Hóast Zelenskyj er glaður fyri vitjanirnar, so er tað tó meira umráðandi fyri hann, at hesar vitjanir eisini merkja, at hann fær meira stuðul," sigur Rasmus Tantholdt.

Hugtikin av Zelenskyj

Í sambandi við vitjanin í Kyiv, so hevur Mette Frederiksen sagt, at hon er hugtikin av Zelenskyj og ukrainska fólkinum, sum vísir so stórt dirvi og stóra mótstøðu í hesum ógrundaða krígnum. 

"Eg gleði meg at møta Zelenskyj, og míni boð til hansara fara at vera, at Danmark framhaldandi fer at hjálpa Ukraina. Vesturheimurin stendur saman í stuðlinum til ukrainska fólkið," sigur Mette Frederiksen í einum tíðindaskrivi.