- Tíðindi, mentan og ítróttur
Politikkur fyri Arktis liðugur í ár
Í løtuni verður mett um, hvørja ávirkan innrásin í Ukraina og avleiðingarnar av henni, kunnu fáa á samstarvið millum londini í Arktis, serliga í Arktiska ráðnum.
Tað sigur Jenis av Rana, landsstýrismaður í uttanlandsmálum, í svari til Eyðdis Hartmann Niclasen í Sambandsflokkinum.
Hann sigur, at samstarvið í Arktis verður raðfest frammarlaga í landsstýrinum, og Føroyar hava virknan lut í arbeiðnum í Arktiska ráðnum.
Arbeitt verður við at orða sjálva strategiina ella politikkin fyri Arktis, og hetta arbeiðið verður væntandi liðugt seinni í ár.
Samstarvið í Arktis verður raðfest frammarlaga, og Føroyar hava virknan lut í Arktiska ráðnum.
Jenis av Rana, landsstýrismaður.
Føroysk áhugamál stýra
Tað eru altíð føroysk áhugamál, sum stýra uttanríkispolitisku kósina, eisini í Arktis, sigur Jenis av Rana.
Endalig støða er ikki tikin til, um ein arktisk strategi ella politikkur verður skipað sum ein frágreiðing til løgtingið, ið kann verða grundarlag undir aðalorðaskifti.
Jenis av Rana sigur, at danska stjórnin hevur eisini arbeitt fyri felags strategi fyri alt ríkið, og Føroyar hava latið sítt ískast til hesa tilgongd, men eina tíð hevur verið stígur í arbeiðnum.
Tí er ógreitt, hvørja lagnu tann ætlanin fær, sigur landsstýrismaðurin í uttanríkismálum, í svarinum til Eyðdis Hartmann Niclasen.