Løgtingið sleppur ikki at taka støðu til radaran

Samgongan heldur ikki, at løgtingið skal gera av, um radari skal byggjast í Føroyum.

Umboðini hjá samgonguni í Uttanlandsnevndini mæla frá at samtykkja uppskotið til samtyktar um at leggja grundleggjandi avgerðina um loftrúmsradara fyri løgtingið til avgerðar.

Tjóðveldi, Javnaðarflokkurin og Framsókn eiga uppskotið.

Samgongan sigur, at verjumál og uttanríkismál eru donsk málsøki og uttan fyri heimastýrislógina.

Ongantíð samtykt nakra heimild

Minnilutin í Uttanlandsnevndini, Tjóðveldi og Javnaðarflokkurin, mæla løgtinginum til at samtykkja uppskotið.

Flokkarnir siga, at løgtingið hevur ongantíð samtykt ella givið nakra heimild til, at hernaðarútgerð kann setast upp í Føroyum. 

Hinvegin hava allir flokkar í sambandi við ymsar hernaðarsamtyktir í løgtinginum síðani seinna heimsbardaga mótmælt, at avgerðir verða tiknar um hernaðarútgerð í Føroyum uttan um løgtingið.

Eingin grundgeving er fyri, at eitt slíkt mál um at seta ein hernaðarradara upp í Føroyum ikki verður lagt fyri løgtingið, siga Tjóðveldi og Javnaðarflokkurin í Uttanlandsnevndini.