Finnland væntar at fáa limaskap í hesum árinum

Fnski forsætisráðharrin, Sanna Marin, sigur seg vænta, at Finnland fær limaskap í NATO í hesum árinum.

Tað sigur hon við finska sjónvarpið, YLE.

Sunnudagin boðaði Finnland frá, at landið fór at biðja um limaskap í NATO, tí stjórnin hevði gjørt av at sleppa málinum, um at landið skuldi vera uttanveltað.

Og stjórnin duldi ikki fyri, at russiska innrásin í Ukraina hevur avgjørdan týdning í avgerðini.

Russland hevur sagt, at tað kann fáa avleiðingar, at Finnland nú fer upp í NATO.

Erdogan framvegis ímóti

Í USA er stórur meiriluti fyri at geva bæði Finnlandi og Svøríki limaskap í NATO, upplýsa politikarar, sum hava vitjað í Finnlandi.

Men turkiski forsætisráðharrin, Erdogan, endurtók á tíðindafundi í gjárkvøldið, at Turkaland ikki uttan víðari fer at játta, at Finnland og Svøríki gerast limir í NATO.

Tey boðini komu, eftir at Svøríki í gjár boðaði frá, at landið saman við Finnlandi fer at søkja um limaskap í verjusamgonguni.

erdogan_759.jpg

Turkiska støðan er greið, sigur Erdogan, forseti.

Ala upp yvirgangsfólk

Erdogan sigur, at londini ala upp yvirgangsfólk, sum stríðast ímóti turkisku myndugleikunum.

Tí er ikki neyðugt hjá Svøríki og Finnlandi at senda fólk til Turkalands at royna semju, tí turkiska støðan er greið, segði Erdogan.

Skulu Svøríki og Finnland fáa limaskap í NATO, so mugu øll hini londini vera samd um tað.