Neyðugt at broyta útberingina hjá Suðuroyar apoteki

Nýggja KT-skipanin hjá Apoteksverkinum ger, at verandi útbering frá Suðuroyar apoteki ikki ber til.

Tað sigur Kaj Leo Holm Johannesen, landsstýrismaður, sum hevur svarað Henriki Old, løgtingsmanni, sum spurdi, hví tænastan, har privat fólk koyra heilivág út frá Suðuroyar apoteki, ikki kann halda fram.

Posta skal bera út heilivágin í framtíðini. Posta ber út allan heilivág fyri Apoteksverkið, uttan í Suðuroynni.

Tó ber Posta út tann heilivágin, sum er í skamtposum frá Framleiðsluapotekinum. 

Apoteksverkið sigur, at bara Posta kann bera út heilivág til allar bygdir í Føroyum hvønn dag við teimum treytum, sum Apoteksverkið hevur til slíka útbering.

Kaj Leo Holm Johannesen sigur seg ikki vita, at Posta skal hava aðrar tænastur í heilsuverkinum, sum privat feløg og einstaklingar í dag hava.