Ikki neyðugt við hjálpartiltøkum enn

Fíggjarmálaráðið mælir frá at hjálpa húsarhaldum og øðrum við pengum, sum ikki fáast við at lækka aðrar almennar útreiðslur ella hækka skattir ella avgjøld. 

Uni Rasmussen, landsstýrismaður, er avgjørdur, tá hann svarar spurningum frá Sirið Stenberg og Eyðgunn Samuelsen, løgtingskvinnum, sum spyrja um hjálparpakkar, nú inflatiónin er vaksin so nógv.

Uni Rasmussen sigur eisini, at enn eru príshækkingarnar í Føroyum ikki so stórar sum í Danmark ella aðrastaðni í Evropa. 

Prísvøksturin í Føroyum var 4,4 prosent fyrsta ársfjórðing í ár. Hann var 7 til 10 prosent um árið í øðrum londum í Evropa, serliga tí gassið er vorðið nógv dýrari.

Og streymprísurin er ikki hækkaður enn í Føroyum.

Fylgja gongdini

Uni Rasmussen sigur, at Fíggjarmálaráðið fylgir neyvt við gongdini í prísvøkstrinum og metir støðugt, um neyðugt og ráðiligt er at seta í verk hjálpartiltøk frá almennari síðu í sambandi við prísvøksturin, sum sæst í løtuni.

Hetta er ikki neyðugt og ráðiligt enn, sigur hann.

matvøruhandlar, matvørur,gjaldskort,vørur, prísir, prísvøkstur, tilboð. pengar, peningur, sjávtøkur,reiður peningur, búskaparvøkstur, búskapur

Príshækkingarnar eru ikki so stórar sum aðrastaðni í Evropa, sigur Uni Rasmussen. (Savnsmynd: Bjarni Ártin Rubeksen)

Gerst neyðugt og ráðiligt at veita fíggjarliga hjálp, mælir Fíggjarmálaráðið til at brúka verandi skipanir hjá landinum til endamálið, til dømis familjuískoytið, persónligu viðbótina í fólkapensjónini ella møguleikarnar, sum eru í almannalógini.

Og, sigur landsstýrismaðurin í fíggjarmálum, Fíggjarmálaráðið mælir frá at brúka skattaskipanina ella broyta avgjøld ella meirvirðisgjaldið á ávísum vørum í sambandi við prísvøksturin. 

Tíðaravmarkað hjálpartiltøk

Fíggjarmálaráðið mælir eisini til, at møgulig hjálpartiltøk vera tíðaravmarkað, og at tey eru fult fíggjað við at lækka aðrar útreiðslur hjá landinum ella hækka inntøkurnar hjá landinum. 

Til dømis kunnu ófíggjað hjálpartiltøk gera, at prísvøksturin í samfelagnum verður enn størri og at enn størri trýst kemur á bústaðarmarknaðin.

Uni Rasmussen sigur, at flestu altjóða búskaparstovnar vænta, at prísvøksturin fer at hæsa av aftur seinni í ár og í 2023.