Vilja hava fleiri túrar við Sam og betri busssamband

Nú er ein ferðavinnuætlan gjørd fyri Kalsoynna.

Arbeiðið at gera ferðavinnuætlan fyri oynna byrjaði við borgarafundi í februar, og nú er frágreiðingin liðug, skrivar Visit Faroe Islands.

Frágreiðingin vísir, at ferðavinnan í Kalsoynni er sum heild væl skipað, tó at fleiri viðurskifti kunnu skipast øðrvísi.

Sambært frágreiðingini er neyðugt, at Sam siglir fleiri túrar, at busssambandið í oynni verður betri, og at ein bíleggingarskipan til Sam verður gjørd.

Leiga súkklu

Frágreiðingin skjýtur eisini upp, at tað skal bera til at leiga sær súkklu fyri at minka um ferðsluna í oynni.

Neyðugt er eisini at fáa fleiri parkeringspláss, serliga á Trøllanesi, og nýggj skelting skal eisini betra um ferðsluviðurskiftini.

Strandferðslan hevur gjørt av, at Sam skal sigla fleiri túrar týsdag, hósdag og leygardag. Tann royndarskipanin er longu sett í verk, og verður galdandi til 1. september.