Norska trygdarløgreglan: Færri islamskar yvirgangshóttanir

Yvirgangshóttan frá víðgongdari islamismu er minkað, staðfestir norska trygdarløgreglan, PST, í nýggjastu hóttanarmetingini, sum var kunngjørd í dag.

Tað merkir, at minni enn 40 prosent sannlíkindi eru fyri, at víðgongdir islamistar fara at royna at fremja yvirgang í Noregi næstu 18 mánaðirnar, skrivar PST.

- Vit hava sæð stóra minking í málum, sum seta í gongd yvirgang, og eisini færri víðgongd norsk umhvørvi og radikalisering, við fokusi á norsk viðurskifti, sigur PST.

40-60 prosent

Løgreglan heldur, at tað er møguleiki fyri, at víðgongd á høgravonginum fara at fremja yvirgang í Noregi næstu 18 mánaðirnar. Sannlíkindi fyri tí eru 40 til 60 prosent, altso størri enn hóttanin frá víðgongdum íslamistum.

PST vísir á, at fleiri høgravíðgongdar álopsætlanir hava verið í Evropa, sum hava havt ungdóms- og framhaldsskúlar sum mál.

 - Tí meta vit, at eisini skúlar kunnu vera mál hjá víðgongdum á høgravonginum. Vit leggja tó dent á, at vit ikki ítøkiliga stúra fyri, at skúlar skulu vera mál í nakrari yvirgangsatsókn í Noregi nú, sigur PST í trygdarmetingini.