Tosa: NEMA gjørt sær dælt av støðuni

Fyrrverandi leiðslan í telefyritøkuni, Tosa, hevur kært NEMA til Fjarskiftiseftirlitið, Dátueftirlitið, Kappingareftirlitið og Brúkaraumboðið. Tey halda, at NEMA hevur gjørt sær dælt av støðuni, nú Tosa kom í trupulleikar og fór undir trotarbúarviðgerð.

Tosa hevur veitt fartelefoni á netinum hjá NEMA.

Tosa hevur í seinastuni ikki rindað fyri hesa tænastu, og fyribils bústjórin hevur boðað NEMA frá, at sáttmálin skal ógildast. Tí hevði NEMA heimild at sløkkja fartelefonnetið hjá Tosa longu mánadagin, men tað er ikki gjørt enn.

Gudny Langgaard

Gudny Langgard er stjóri í NEMA.

Hava heimild at sløkkja netið

Gudny Langgaard, stjóri í NEMA, vil ikki gera viðmerking, men sigur í skrivligum boðum, at fyrrverandi leiðslan í Tosa hvørki hevur heimild ella innlit í at viðgera viðurskifti hjá Tosa, nú tað er farið undir trotabúarviðgerð. Hon sigur, at NEMA hevur fulla heimild at sløkkja farnetið, men at tað er opið enn, fyri ikki at seta Tosa viðskiftafólkini í eina keðiliga støðu.

"Talan er um eina undantaksstøðu, og NEMA hevur leypandi samskifti við myndugleikarnar, og kennir onki til nakrar formellar kærur", sigur Gudny Langgaard, stjóri í NEMA.

Fyrrverandi leiðslan í Tosa vil ikki gera viðmerkingar til málið.