Grønlendskir faðirloysingar umhugsa at stevna danska statinum

Fyri triðju ferð í grønlendsku søguni, reisa grønlendingar nú endurgjaldskrav móti danska statinum.

27 løgfrøðiligir faðirloysingar hava sent danska statinum krav um 125.000 krónur í endurgjaldi hvør, skrivar grønlendska kringvarpið, KNR.

Og verður kravið víst aftur, verður farið í rættin við málinum, sigur Mads Pramming, sum er advokatur hjá teimum 27 faðirloysingunum. 

Til lógin um javnrætt hjá børnum kom í gildi í 1963, og í Norður- og Eysturgrønlandi í 1974, var ikki faðirskapsskyldubinding fyri børn, ið vóru fødd uttan fyri hjúnalag.

Tann bólkurin av børnum er seinni vorðin kendur sum løgfrøðiligir faðirloysingar. Eisini nakað upp í 1970-ini eru dømi um grønlendsk børn, sum eru fødd uttan arvarætt.

4.600 faðingarloysingar tilsamans

Um endurgjaldskravið vinnur frama, kunnu eisini onnur børn, ið eru faðirloysingar í Grønlandi, krevja endurgjalda frá danska statinum.

Tað finnast eingi almenn tøl, men mett verður, at tað eru umleið 3.300 faðirloysingar í Grønlandi og 1.300 faðirloysingar í Danmark, sambært einari frágreiðing frá 2017.

Í 2014 var lógin um arvarætt broytt, so tey, sum eru løgfrøðiligir faðirloysingar, kunnu reisa endurgjaldskrav, og hava rætt til arv.

Men, lógin slær fast, at løgfrøðiligir faðirloysingar bara kunnu fáa lut í arvi, um deyðsbúgvið ikki longu er gjørt upp, sum faðirloysingar áður hava funnist at.