Kommunan yvirtekur fleiri landsvegateinar

Tórshavnar kommuna hevur gjørt eina avtalu við Landsverk um at yvirtaka fleiri landsvegateinar. Talan er um eitt nú Hvítanesvegin, Kúrdalsveg, part av Oyggjavegnum og part av Velbastaðvegnum.

Talan er um vegastrekki, sum nú eru landsvegir, sum kommunan yvirtekur.

Hvítanesvegurin verður yvirtikin frá vegamótinum við Eystara Ringveg, til nýggju rundkoyringina til Eysturoyartunnilin, góðar 3 kilometrar. Samstundis verður vegastubbin oman til rulluportrið á Hvítanesi eisini yvirtikin.

Býarvøkstur

Kúrdalsvegur frá Hvítanesvegnum og oman í túnið við gomlu Royndarstøðina í Hoyvík verður yvirtikin. Somuleiðis verður Oyggjarvegurin, frá vegamótinum Vestari Ringvegur og til íbindingina við Hotel Føroyar, yvirtikin. Sama er galdandi fyri Velbastaðvegin, frá vegamótinum við Marknagilsvegin og niðan til rulluportrið við Norðasta Horn.

Nú kommunan yvirtekur hesar vegir, verða samstundis fleiri øki atkomulig til býarvøkstur, bæði tá talan er um bústaðabygging, vinnuøki og eitt nu parkeringsøki, sigur Tórshavnar kommuna.