Russland farið á ríkishúsagang

bannari
Russland farið á ríkishúsagang
Russland megnaði ikki at rinda 100 milliónir dollarar í rentu, sum fullu til gjaldingar sunnudagin 26. juni
Mynd: Ritzau Scanpix  
 
27.06.2022 - 17:16

Hamarin hevur av álvara rakt Russland, sum í gjár ikki megnaði at gjalda 100 milliónir dollarar í rentum til útlendskar íleggjarar.

Tað skriva amerikanski fíggjarmiðilin, Bloomberg, og bretska BBC News, ið bæði siga, at Russland er farið á ríkishúsagang, skrivar Ritzau.

Russland megnaði 27. mai ikki at rinda eina rentuafturgjalding, sum landið skuldu havt goldið í dollarum.

Tá ið so 30 dagar eru gingnir, uttan at íleggjararnir hava fingið peningin, er landið farið á ríkishúsagang, skrivar BBC News.

Vanliga eru tað stóru metingarfyritøkurnar, ið kunngera, at eitt land er farið á ríkishúsagang. Tað merkir, at ríkiskassarnir eru tómir, og londini ikki megna at afturgjalda skuldina.

Men, ES hevur givið trimum teimum størstu metingarfyritøkunum - S&P, Moody's og Fitch - forboð fyri at kredittmeta Russland, og tær kunnu tí ikki lýsa Russland at vera farið á ríkishúsagang.

Tað fær ongar formligar avleiðingar, at eitt land fer á ríkishúsagang, men tað kann gerast verri hjá landinum at læna pening í framtíðini.

Russland hevur áður sagt, at tað verður trupult hjá landinum at afturgjalda skuldina, tí Vesturheimurin hevur sett í verk revsitiltøk móti landinum.

Ein stórur partur av peninginum, Russland eigur í dollarum og evrum, verður goymdur uttanlands. Fleiri lond afturhalda peningin, og tí er tað trupult hjá landinum at afturgjalda skuldina í løtuni.

Er kopiera
Nýggjastu sendingar í ÚV
Mikudag 18. november
Skratsj 18. nov. 2026
216628
Mikudag 18. november
Mono 3 - Fróði Løksagarð - 181126
216627
Mikudag 18. november
Skipsboð
216603
Mikudag 18. november
Heilsuhornið
216597
Nýggjastu sendingar í SV
Mikudag 18. november
Dagur og vika - teknmálstulkað
216592
Týsdag 17. november
Veðrið
216565
Týsdag 17. november
Dagur og vika við 3-2 - teknmálstulkað
216520
Mánadag 16. november
Veðrið
216486
Mánadag 16. november
Bygdarliv 4 – Eiði
216470