Eurovision verður í Bretlandi næsta ár

Bretland verður, vegna Ukraina, vertur fyri Eurovision 2023. Ukraina sleppur ikki at hýsa sangkappingini orsakað av krígnum.

Tað boðar EBU, sum eigur Eurovision, frá. Tað verður bretska kringvarpið, BBC, sum fer taka sær av kappingini.

Ukraina og bólkurin, Kalush Orchestra, vunnu Eurovision-kappingina, sum var í Torino í Italia fyrr í ár.

Vanligt er, at landið, sum vinnur kappingina, skipar fyri kappingini árið eftir, men soleiðis verður ikki næsta ár. 

Orsøkin er russiska innrásin í Ukraina, og at tað tí er torført at leggja tiltakið tilrættis.

Enn er ikki greitt, hvør býur í Bretlandi skal hýsa Eurovision 2023.