Kina hevur hernaðarvenjing eftir vitjan hjá Pelosi í Taivan

Uttanríkisráðið í Taivan sigur, at kinesiski herurin hevur skotið tilsamans 11 Dongfeng-rakettir í havið út fyri norður-, suður- og eystara part av Taivan.

Tað skrivar Reuters.

Fyrr í dag skeyt kinesiski herurin eina rakett nærindis Matsu-oyggjunum í Taivan-sundinum.

Kinesiska venjingin var sett í verk, eftir at forkvinnan í amerikanska umboðsmannatinginum, Nancy Pelosi, var í Taivan á vitjan, sum sambært Kina er undir kinesiskum valdi.

Nancy Pelosi í Suðurkorea

Nancy Pelosi hitti eisini formannin í suðurkoreanska tinginum, Kim Jin-pyo. (Mynd: Ritzau Scanpix)

Pelosi í Suðurkorea

Nancy Pelosi hitti í morgun leiðarar í Suðurkorea, dagin eftir umstríddu vitjanina í Taivan.

Eftir stuttu vitjanina í Taivan, flugu Pelosi og sendinevnd hennara í gjárkvøldið til Seoul, sum er annað landið, hon vitjar á ferðini í Eysturasia.

Pelosi endaði vitjanina í Taivan við at endurtaka lyfti hjá USA um at verja frælsið hjá Taivan, hóast tað hevur fingið øði í Kina.

Í dag hitti hon forsetan og aðarar leiðarar í ovastu leiðsluni í suðurkoreiska tjóðartinginum, har tosað var um trygd, búskaparligt samstarv og veðurlag.

Seinni í dag skal hon eftir ætlan til marknaliðið millum Suðurkorea og Norðurkorea.

Kinesarar í øðini

Vitjanin hjá Pelosi í Taivan hevur elvt til vreiði í Kina, sum nú svarar aftur við at skipa fyri stórari kinesiskari hernaðarvenjing í havøkinum kring Taivan.

Venjingin varar í fimm dagar, til sunnudagin á middegi, og vant verður bæði á sjónum og í luftini kring Taivan, sigur kinesiska sjónvarpið.

10 kinesisk sjóverjuskip løgdu seg í Taivansundið týsmorgunin, og tey vera har til seinnapartin í dag.

Hetta er størsta venjing, sum Kina nakrantíð hevur havt í sjóøkinum kring Taivan.