Landið og kommunur skulu lata somu løn

Landið og kommunurnar skulu lata somu løn í framtíðini.

Kommunala arbeiðsgevarafelagið og Fíggjarmálaráðið hava gjørt rammuavtalu, har staðfest er, at tey í mest møguligan mun samstarva um sáttmálasamráðingar og sáttmálar á almenna arbeiðsmarknaðinum.

Endamálið er, at lønin verður tann sama hjá teimum, sum arbeiða hjá landinum, og teimum, sum arbeiða hjá kommununum.

Har annar parturin hevur fá starvsfólk á sáttmálaøkinum, ger størri parturin sáttmála, og hin parturin tekur undir við honum.

20 sáttmálar eftir

Miðað verður eftir felags sáttmálum, har tað ber til. 

Sum nú er, skal Fíggjarmálaráðið góðkenna allar lønarsáttmálar, sum Kommunala arbeiðsgevarafelagið ger.

Fíggjarmálaráðið skal samráðast um 20 sáttmálar, sum fara úr gildi 1.oktober, millum annað teir hjá Lærarafelagnum og Akademikarafelagnum.

Enn er eftir at gera nýggjar sáttmálar fyri tríggjar, sum fóru úr gildi 1.oktober í fjør.