- Tíðindi, mentan og ítróttur
Herjólfur fer at sigla við farmi fýra dagar um vikuna
![](https://kvf.fo/sites/default/files/styles/grein-ovasta-mynd/public/herjolfur_iii_-12.jpg?itok=Mghx2RLR)
Herjólfur III skal sigla við farmi fýra dagar um vikuna, tá hann siglir á suðuroyarleiðini saman við Smyrli.
Siglt verður ikki leygardagar, sunnudagar og mánadagar.
Ferjan skal til Íslands í oktober, og verður har í 14 dagar.
Annars hava Strandfaraskip landins leigað hann til september næsta ár.
Tá hann kemur aftur úr Íslandi, heldur hann fram við farmasiglingini á suðuroyarleiðini.
Fingið pengar
Strandferðslan hevur nú fingið pening, so Herjólfur III kann sigla alt samdøgrið, tá hann skal sigla fyri Smyril í 40 dagar.
Smyril fer í dokk í Danmark um tvær vikur, tann 19.august.
Løgtingið játtaði í gjár 3,2 mió. kr. til olju og manning á ferjuni.
Ætlanin er, at Herjólfur III siglir 42 túrar um vikuna, tá hann skal sigla fyri Smyril. Hetta eru seks túrar fleiri enn upprunaliga ætlað.
Siglt verður við farmi um náttina.
Herjólfur III liggur framvegis við skipasmiðjuna hjá Mest á Skála, har hann verður gjørdur klárur til suðuroyarsiglingina.