Døglingar aftur gjørt landgongd í Hvalba

Tríggir døglingar hava í dag gjørt landgongd í Hvalba. 

Tað var um middagsleitið, at døglingarnir komu inn á fjørðin og svumu upp á land, upplýsir Tommy Olsen, grindaformaður. 

Døglingur er ein friðaður hvalur, og tað er ólógligt at reka døglingar á land. Men tað kemur javnan fyri, at døglingar sjálvir gera landgongd í Hvalba og Sandvík. 

Tvífalt so stórir

So seint sum sunnudagin løgdu tríggir døglingar beinini í Hvalba. 

Tommy Olsen sigur, at døglingarnir, sum løgdu beinini í dag, eru umleið tvífalt so stórir sum teir, ið gjørdu landgongd sunnudagin. 

Tvøstið á døglingunum verður býtt millum fólkið í Hvalbiar sókn. Enn er óvist, hvussu stórir partarnir verða hesaferð, men sunnudagin vóru  4,8 tons av tvøsti býtt til sóknina.