Nógvir migrantar um Ermasund

Higartil í ár eru yvir 25.000 flóttafólk og migrantar komin um Ermasund til Bretlands, upplýsa myndugleikarnir í Bretlandi.

Í gjár tók bretska sjóverjan 915 fólk úr 19 smáum bátum, sum vóru á ferð um sundið.

14. august upplýstu myndugleikarnir, at yvir 20.000 fólk vóru komin um Ermasund. Higartil í august eru 8.747 fólk skrásett at vera komin til Bretlands um Ermasund. Í fjør komu 11.300 fólk úr Fraklandi til Bretlands somu mánaðir.

Seinastu árini eru alsamt fleiri fólk sum royna at koma um Ermasund til Bretlands, skrivar NTB.