Føroya Arena í donsku fíggjarlógini

Føroya Arena er við í uppskotinum um donsku fíggjarlógina, sum var lagt fram í gjár.

1,8 mió. kr. skulu latast longu í ár, 2,5 næsta ár, 10,4 í 2024 og 15,3 milliónir í 2025, tilsamans 30 milliónir krónur.

Stjórnin og fimm flokkar í fólkatinginum gjørdu avtalu um Føroya arenu, tá fíggjarlógin fyri 2022 var gjørd í desember í fjør.

Treytin er tó, at onnur fígging eisini er, so marghøllin verður bygd.

Pengar eru eisini, sambært somu avtalu í fólkatinginum, til eitt mentanarhús í Vágum, sum eisini skal vera savn fyri sjóvinnu og skipsbygging.