Svøríki: Ógildugar atkvøður kunnu verða góðkendar

Tá ið atkvøðurnar á valinum í Svøríki vóru taldar upp sunnukvøldið, vóru meira enn 90.000 atkvøðuseðlar mettir at vera ógildugir

Bara 47.000 atkvøður eru á muni millum reyða og bláa veingin í svenska ríkisdegnum eftir valið sunnudagin. Henda myndin er frá uppteljingini í Malmø.

Mynd: Ritzau Scanpix

Sigrún H. Brend

13.09.2022 - 10:21

Fleiri av atkvøðuseðlunum á valinum í Svøríki sunnudagin, sum eru mettir at vera ógildugir, kunnu kortini verða góðkendir og sostatt ávirka sera javna valúrslitið.

Tá ið atkvøðurnar vóru taldar upp sunnukvøldið, vóru meira enn 90.000 atkvøðuseðlar mettir at vera ógildugir.

Tað eru fylkisstýrini, sum endaliga skulu góðkenna atkvøðuseðlarnar, og niðurstøðan hjá teimum kann vera, at túsundtals atkvøður kortini eru gildugar, skrivar tíðindastovan TT.

Fylkini góðkendu 25.000 atkvøður

Á valinum í 2018 ógildaðu kommunurnar nærum 84.000 atkvøður, men fylkini góðkendu kortini 25.000 av teimum.

Í gjárkvøldið vóru 47.000 atkvøður á muni millum reyða og bláa veingin, blái vongur hevði munin.

Endaliga valúrslitið verður ikki greitt fyrr enn í morgin ella hósdagin.