Mótmælti at forkvinnan var koyrd frá

Fakligi skrivarin í Etiska ráðnum mótmælti, tá ið landsstýrismaðurin valdi at koyra Anne Mette Greve Klemensen frá sum forkvinnu og úr ráðnum. Tað vísa skjøl í málinum.

Arnbjørn Ólavsson Dalsgarð, sum er fakligur skrivari, vendi sær til Heilsumálaráðið og vísti á, at eftir hansara meting var skeiðið hjá Anne Mette Greve Klemensen ikki úti fyrr enn í oktober 2024, tá hon hevði sitið eitt fýra ára skeið.

Metingin hjá fakliga skrivaranum var tó ikki tikin til eftirtektar.

Nýggja Etiska ráðið við Bergi Debes Joensen, sóknarpresti í Havn, sum formanni, tekur við um góða viku, tann 1. oktober.