30 mió. til Fróðskaparsetrið næstu árini

Næstu árini skulu brúkast 30 milliónir krónur um árið til at høvuðsumvæla gamla Venjingarskúlan í Havn til eitt universitetskampus til Fróðskaparsetrið.

Ætlanin er at landið yvirtekur ognarlutin hjá Tórshavnar Kommunu í Venjingarskúlanum móti, at kommunan
yvirtekur partar av bygningunum, har Studentaskúlin í Hoydølum helt til, umframt partar av
lendinum á økinum.

Fróðskaparsetrið skal síðani stigvíst flyta úr leigumálinum í Sjóvinnuhúsinum, soleiðis at alt virksemi er flutt úr Sjóvinnuhúsinum í seinasta lagi tann 31. desember 2024.

Fyri at Fróðskaparsetrið skal kunna nýta ognirnar til sítt virksemi krevst, at ognirnar verða
høvuðsumvældar og umbygdar til tørvin hjá Fróðskaparsetrinum. 

Landsverk hevur gjørt eina yvirskipaða kostnaðarætlan og tíðarætlan fyri verkætlanina, ið verður framd í stigum heilt fram til 2028. Kostnaðarmetingin hjá Landsverki er 144 milliónir krónur. 

Í fíggjarlógaruppskotinum fyri 2023 eru játtaðar 30 milliónir til høvuðsumvælingina. Og síðani skulu játtast 30 milliónir afturat um árið, næstu árini.