Forskúli á Tvøroyri næsta skúlaár

Forskúli verður á Tvøroyri frá næsta skúlaári.

Tað hevur Tvøroyrar býráð einmælt samtykt.

Almennur kunnandi fundur verður um forskúlan í Trongisvágs skúla mikukvøldið.

22.mars í ár samtykti Tvøroyrar býráð tilmæli frá mentanarnevndini um at seta ein arbeiðsbólk at lýsa møguleikar og kanna fyrimunir og vansar við at skipa ein forskúla í Tvøroyrar kommunu.

Arbeiðsbólkurin mælir til, at forskúlin verður í Trongisvágs skúla, í stovunum 6 og 7, sum eru ein dupultstova, sum verður innrættað til endamálið. 

700 kr. um mánaðin

Býráðið hevur samtykt, at forskúlin kostar 700 kr. um mánaðin. Goldið verður fyri 11 mánaðir um árið. 

Forskúlin er í galdandi avsláttarskipan hjá Tvøroyrar kommunu fyri ansingarøkið.

Í mesta lagi 24 børn kunnu vera í forskúlaflokkum við skúlaársbyrjan.

Tímatalið er í mesta lagi 24 tímar um vikuna.

Í forskúlaflokki skulu vera bæði lærari og námsfrøðingur.