Nýggjur formaður í italska senatinum

Ignazio La Russa, sum er kendur fyri at hava eina standmynd av fasistiska einaræðisharranum, Benito Mussolini, í stovuni hjá sær, er valdur til formann í italska senatinum.

Starvið sum formaður er næsthægsta í tign í Italia eftir forsetan.

75 ára gamli La Russa var valdur við 116 av 206 atkvøðum, tá ið senatið hittist fyrstu ferð síðani valið í september. 

Hann er limur í víðgongda høgraflokkinum, Italsku brøðurnir, sum vann valið. 

Giorgia Meloni - Mynd: Ritzau Scanpix

Giorgia Meloni fer væntandi at skipa stjórn seinni í mánaðinum. (Mynd: Ritzau Scanpix)

Meloni verður forsætisráðharri

Giorgia Meloni er forkvinna í flokkinum, og hon er fyrsta kvinna, sum verður forsætisráðharri í Italia. 

Fyri at fáa meirluta, mátti Meloni skipa stjórn saman við tveimum øðrum flokkum á ytsta høgraveingi, Lega hjá Matteo Salvini og Forza Italia hjá Silvio Berlusconi.

Stjórnin, sum helst verður mesta høgra-víðgongda stjórn í Italia síðani seinna heimsbardaga, verður væntandi skipað seint í hesum mánaðinum.

Men longu í dag eru tekin um, at stevið er ikki so gott í samgonguni. 

Millum annað atkvøddu fleiri limir í Forza Italia ikki fyri at fáa Ignazio La Russa til formann, skrivar NTB.