Brúktu kamikazedronur í álopum á Kyiv

Fleiri spreingingar hava í morgun verið í Kyiv, høvuðsstaðnum í Ukraina.

Tað váttar borgarstjórin, Vitalij Klytjko, á boð- og samskiftistænastuni Telegram, skrivar tíðindastovan, Reuters.

Skrivstovan hjá ukrainska forsetanum boðar frá, at kamikazedronur vóru brúktar í álopinum. Tílíkar dronur verða eisini nevndar sjálvmorðsdronur.

Skrivstovan hjá ukrainska forsetanum skrivar eisini, at Russland skipaði fyri álopunum.

Spreingingarnar vóru miðskeiðis í høvuðsstaðnum, har ið fleiri søguligir bygningar eru.

Fleiri bygningar hava fingið skaða, og bjargingarfólk eru farin út at hjálpa.

Enn eru ikki nøkur boð komin um, at fólk eru deyð ella hava fingið skaða.