Trý føroysk verk kappast um norðurlendskar virðislønir

Trý føroysk verk eru við, tá virðislønir Norðurlandaráðsins verða latnar í Helsinki í kvøld.

Dánial Hoydal og Annika Øyrabø eru innstillað til at fáa virðisløn fyri barna- og ungdómsbókmentir.

Bók teirra "Abbi og eg og abbi" er innstillað.

Unn Patursson er við í kappingini um at fáa tónlistarvirðislønina fyri verk sítt "1902." Og Beinir Bergsson er innstillaður til bókmentavirðislønina fyri yrkingasavnið "Sólgarðurin."

Eivør handar

Eivør Pálsdóttir, sum vann í fjør, handar tónlistarvirðislønina.

Virðislønirnar eru 300.000 danskar krónur.

Elsta virðislønin er bókmentavirðislønin, hon er 60 ár í ár.

Sjónvarpið hjá Kringvarpinum sendir frá tiltakinum í Musikkhúsinum í Helsinki eftir Dag og viku í kvøld.