Fimm menn ákærdir fyri serliga ráan harðskap

Fimm ungir menn, 18 og 19 ára gamlir, eru ákærdir fyri serliga ráan harðskap.

Teir eru ákærdir fyri í tíggju minuttir sunnunáttina 27. juni í fjør at hava sparkað og sligið ein mann ferð eftir ferð, og ákæran umfatar eisini kvørkratak og tramp í høvdið.

Harðskapurin skal vera framdur í trimum førum og skal, sambært ákæruritinum, vera hendur í Klaksvík, millum annað á fótbóltsvøllinum.

Fýra kroyst rivjabein

Maðurin, sum var álopin, fekk sár, blá merki, fýra kroyst rivjabein, brot á høgra alboga og hann misti ein jaksil, stendur í ákæruritinum.

Ein maður aftrat, hann er 18 ár, er ákærdur fyri at skumpa álopna mannin og leggja hann niður á vegin, tá harðskapurin byrjaði við Atlantis bio klokkan fimm sunnunáttina 27. juni í fjør.

Føroya rættur hevur sett av tveir dagar í næstu viku til málið.