84 prosent av orkuni í Suðuroy var grøn í oktober

Suðuroyggin skaraði framúr í oktober, tá ið ræður um grøna orku. Ongantíð hevur ein mánaður hilnast so væl við grønari orku.

Orsøkin er partvís sera góð vind- og vatnviðurskifti, og partvís nýggja battarískipanin og synkronkompensatorin í Porkeri, sum kom í rakstur í summar, sigur SEV.

Heili 84 prosent av orkuframleiðsluni stavaðu frá grønum orkukeldum, meðan motorarnir á Vágsverkinum stóðu fyri 16 prosentum, sum er tað minsta yvirhøvur.

SEV í Vági, Vágsverkið hjá SEV

Motororkuverkið hjá SEV í Vági.

Vágsverkið stilt í tríggjar vikur

Vindmyllurnar í Porkeri stóðu fyri  góðum 60 prosentum, og vatnorkuverkið í Botni stóð fyri góðum 23 prosentum av elorkuni.

Vágsverkið hevur ongantíð fyrr framleitt so fáar kilowatttímar úr olju sum í oktober, ella 0,47 GWt. Tað svarar til góð 95 tons av olju.

Vágsverkið stóð stilt í 22 dagar, meðan framleiðslan var 100 prosent grøn.

Í tíðindasendingini klokkan 16 verður samrøða við Terja Nielsen, menningarleiðara hjá SEV.