Elbilar og skattalætti í tinginum í dag

Frá 1. januar í 2025 fáa bara tey, sum keypa elakfør ella vetnisakfør, meirvirðisgjaldið aftur.

Og afturberingin minkar ein fjórðing um árið frá 2025 til 2027.

Tey, sum fáa sær elbil ella vetnisbil, verða eisini frítikin fyri meirvirðisgjald í 2023 og 2024. 

Frá 2025 verður virðisgjaldið sett í verk stigvíst, tað vil siga, at tað hækkar. 

Løgtingið fer í dag at viðgera uppskotið hjá landsstýrinum um at lætta um fíggjarliga hjá teimum, sum keypa bil, sum ikki brúkar bensin ella diesel.

Skattalætti og barnafrádráttur

Uppskotið um skattalætta og størri barnafrádrátt er eisini á skránni hjá tinginum í dag.

Barnafrádrátturin í landsskattinum hækkar 2.000 kr. fyri børn undir skúlaaldri og 1.500 kr. fyri børn frá sjey til 17 ár.

Og skattastigin verður broyttur.

Sambært landsstýrinum fáa fólk, sum fáa 23.000 kr. í mánaðarløn, 125 kr. um mánaðin í skattalætta. Fólk, sum fáa 30.000 kr í løn, fáa 250 kr. í lætta.

Uppskotnu broytingarnar í skattalógini fara at kosta landskassanum 79 mió. kr., sigur landsstýrið.

Tingfundurin í dag er klokkan ellivu.