Alzheimerfelagið minnir politikarar á demenssamskiparar

Nú valið nærkast, eru fleiri felagsskapir, sum gera vart við støðuna á sínum øki.

Ein teirra er Alzheimerfelagið, sum í dag kom við einari almennari áheitan á allar flokkar.

Alzheimerfelagið vísir millum annað á, at góðu ynskini í demensætlanini, sum kom út fyri sjey árum síðani, ikki enn eru rokkin. Felagið sigur, at enn eru bara 2,5 demenssamskiparar settir í starv, og sostatt tørvar framvegis 2,8 samskiparar.

Kunnu røkka málinum 

Eysturoyggin, Norðoyggjar, Norðurstreymoy, Vágar og Sundalagið umframt borgarar undir 67 ár fáa tænastur frá einum demenssamskipara, men í Suðurstreymoy, Sandoynni og í Suðuroynni er eingin demenssamskipari. 

Tað merkir, at enn vanta 2,8 samskiparar. Tá ið teir eru settir í starv, er málið rokkið, sigur Alzheimerfelagið. 

Tað fer at kosta landskassanum árliga umleið 600.000 krónur fyri hvørt ársverkið, ella upp ímóti tveimum milliónum krónum tilsamans.