Valrættaraldurin í Ný Sælandi fer helst at lækka

Hægstirættur í Ný Sælandi hevur í morgun gjørt av, at tað er at gera mismun á fólki, at tú skal vera 18 ár fyri at velja.

Tað skrivar The Guardian.

Bólkurin "Make it 16" hevur í meira enn tvey ár havt eitt rættarmál um valrættaraldurin. 

Bólkurin hevur millum annað grundgivið við, at 16 ára gomul eiga at sleppa at velja, tí veðurlagsbroytingar ávirka tey og teirra framtíð.

Mannarættindi skúgvað til viks

Avgerðin hjá hægstarætti merkir, at lóggávutingið í løtuni "skúgvar til viks mannarættindini hjá ungum, og at lóggávuvaldið tí má umhugsa broytingar," skrivar The Guardian.

Jacinda Ardern, forsætisráðharri, sigur, at stjórnin fer at koma við lógaruppskoti um at lækka valrættaraldurin.

Jacinda Ardern sigur seg vera fyri, at aldursmarkið verður lækkað niður í 16 ár.