Meiri peningur til ferðavinnuna

Hóast ferðafólkatalið er nógv vaksið, so heldur Umhvørvis- og Vinnumálaráðið, at játtanin til Visit Faroe Islands eigur at hækka

Ferðafólkatalið er nógv vaksið, og í fíggjarlógini fyri næsta ár verður skotið upp at hækka játtanina til Visit Faroe Islands. Hækkingin skal brúkast til at gerast hagtøl um ferðavinnu.

Mynd: Bjarni Árting Rubeksen

Høgni Djurhuus

22.11.2022 - 10:27

Landið skal brúka fleiri milliónir til ferðavinnuna, ætlaði Umhvørvis- og Vinnumálaráðið.

Í uppskotinum um fíggjarlóg fyri 2023, sum fráfarandi samgonga kom við, verður biðið um 20,2 mió. kr. til Visit Faroe Islands.

Í ár er játtanin 18,4 milliónir krónur.

Fíggjarnevndin hjá løgtinginum sigur, at í 2013 var politisk semja um at seta pening av til serlig átøk at menna ferðavinnuna.

Tað eydnaðist.

Halda aftur

Nú er avbjóðingin í ávísan mun tann øvugta, at halda aftur og ansa eftir, at vit ikki ganga undir í ferðafólki, sigur Fíggjarnevndin.

Nevndin spyr, um Umhvørvis- og Vinnumálaráðið heldur, at brúk framvegis er fyri øktari játtan, nú ferðavinnan er komin upp á hægri stig, enn fá høvdu vónað og væntað.

Tað heldur Umhvørvis- og Vinnumálaráðið.

Vøksturin í uppskotinum um fíggjarlóg fyri 2023 fer til at gera hagtøl um ferðavinnu og til at menna vinnuferðavinnu.

800.000 kr. eru ætlaðar til hagtølini, og ein millón er ætlað vinnuferðavinnuni.